Erik ten Hag oo soo saaray war cusub oo ku saabsan dhaawaca laba ciyaartoy oo muhiim ah ka hor kulanka Liverpool

Tababaraha kooxda Manchester United Erik ten Hag ayaa sheegay in Luke Shaw iyo Jadon Sancho ay labaduba ciyaari karaan kulanka Premier League ee kooxdiisu ay ku wajihi doonto Liverpool Axada (5-ta March).

Shaw, oo 27 jir ah, waxa uu si joogto ah u ahaa kooxda Ten Hag ololahan, isaga oo ka shaqaynayey labada daafac ee bidix iyo daafaca dhexe. Ilaa hadda waxa uu dhaliyay hal gool waxana uu caawiye ka noqday afar gool 31 kulan oo uu u saftay kooxdiisa.

Dhanka kale Sancho ayaa ku jira qaab ciyaareed fiican tan iyo markii uu ka soo laabtay dhaawac bishii hore. Waxa uu shabaqa soo taabtay ka dib markii uu bedel ku soo galay qeybtii labaad ee ciyaarta ay barbaro 2-2 ah la galeen Leeds United. Sancho ayaa sidoo kale shabaqa soo taabtay kulankii ugu dambeeyay ee ay 3-0 kaga badiyeen Leicester City.

Isagoo ka hadlayay shir jaraa’id oo ka hor ciyaarta, Ten Hag ayaa soo bandhigay warar cusub oo ku saabsan dhaawaca ka hor safarka Manchester United ee Liverpool . Wuxuu yidhi:

“Waxaan u maleynayaa inaan dib u heli doono ciyaaryahano qaar, shalay Luke Shaw ma jirin, sidaas darteed waxaan fileynaa inuu soo laaban doono, Sancho waa uu xanuunsanaa, laakiin waa inaan sugno oo aan aragnaa sida ay taasi u dhacdo, laakiin waxaan filayaa inuu sidoo kale diyaar noqon karo”.

Haddii Shaw iyo Sancho ay ku guuldareystaan ​​inay ka gudbaan tijaabada jirdhiska ka hor kulanka axada, Red Devils waxay ku tiirsanaan doontaa Tyrell Malacia iyo Alejandro Garnacho, siday u kala horreeyaan. Ten Hag ayaa sidoo kale laga yaabaa inuu Marcus Rashford ka ciyaaro garabka isla markaana uu ku soo bilowdo Wout Weghorst garoonka cadaawadda leh ee Anfield.

Manchester United ayaa hadda ku jirta kaalinta saddexaad ee kala sarreynta Premier League 2022-23 , iyadoo leh 49 dhibcood 24 kulan oo ay ciyaartay, halka Liverpool ay ku jirto kaalinta lixaad, iyadoo leh 39 dhibcood 24 kulan oo ay ciyaartay.